Ang DASH diet o “Dietary Approaches to Stop Hypertension” ay isang diyeta na inirekomenda para sa mga taong may altapresyon o hypertension. Ang layunin ng DASH diet ay hindi lamang mabawasan ang presyon ng dugo, kundi pati rin ang panganib na magkaroon ng sakit sa puso at stroke.
Ang DASH diet ay binubuo ng iba’t ibang uri ng pagkain na mayaman sa nutrisyon na kailangan ng ating katawan. Pinipili dito ang pagkain ng maraming prutas, gulay, whole grains, lean proteins, at low-fat dairy products. Ang mga ito ay naglalaman ng mas maraming potassium, calcium, magnesium, at fiber:
- Potassium. Ang potassium ay isang mahalagang mineral na tumutulong sa pagpanatili ng tamang presyon ng dugo. Napapabawas nito ang labis na sodium na siya namang nakapagpapataas ng blood pressure. Kapag mataas ang potassium sa iyong katawan, nagiging mabisa ito sa pagtanggal ng sodium sa pamamagitan ng ihi. Sa gayon, bumababa ang antas ng sodium sa katawan, na nagdudulot ng pagbaba ng presyon ng dugo.
- Calcium. Isa pang mahalagang mineral ang calcium sa pagpapanatili tamang ng presyon ng dugo. Ito’y mayroong malaking naitutulong sa pagpapalakas ngmga kalamnan ng puso at sa tamang pagpapatakbo ng mga nerve cells. Kapag sapat ang calcium sa katawan, natutulungan nito ang mga blood vessels na ma-relax at ma-expand, na nagpapababa ng presyon sa loob ng mga ito at nagbubunsod ng mas mababang presyon ng dugo.
- Magnesium. Angmagnesium ay isang mineral na mahalaga sa maraming proseso sa ating katawan, kasama na ang pagpanatili ng tamang presyon ng dugo. Ang sapat na antas ng magnesium ay nagpapababa ng presyon ng dugo sa pamamagitan ng pagluwag ng mga blood vessels na nagpapababa ng presyon. Bukod dito, ang magnesium ay tumutulong rin sa pagpantay ng dami ng iba pang mahahalagang mineral tulad ng calcium at potassium na nakapagpapababa ng presyon ng dugo.
- Fiber. Ang mga pagkain na mayaman sa fiber ay mahalaga para sa mga taong may altapresyon. Ang fiber, lalo na ang soluble fiber, ay tumutulong na bawasan ang cholesterol sa katawan, na maaaring maging sanhi ng pagtaas ng presyon ng dugo. Bukod dito, nag-aambag din ito sa pagpapababa ng timbang dahil nakadudulot ito ng pakiramdam na busog ka nang mas matagal. Ang pag-iwas sa labis na pagkain ay siya namang nagpapababa ng panganib ng hypertension. Sa karagdagan, ang fiber ay tumutulong sa pangangasiwa ng dami ng asukal sa dugo, na mahalaga rin sa pagpapababa ng presyon ng dugo.
Sa DASH diet, mahalaga rin na bawasan ang pagkonsumo ng mga pagkain na may mataas na sodium, taba, at asukal. Kailangan ding iwasan ang pagkain ng mga processed food na karaniwang naglalaman ng maraming sodium at unhealthy fats.
Sa pagsunod ng DASH diet, mas mainam na unti-untiin ang pagbabago sa iyong mga kinaugaliang kainin. Halimbawa, maaaring simulan sa pagdaragdag ng isa o dalawang mga serving ng prutas at gulay sa iyong araw-araw na pagkain. Sa paglipas ng panahon, magiging mas madali na para sa iyo ang kumain ng mas maraming masusustansyang pagkain at kaunti na lang ang unhealthy food.
Hindi lamang pagpapababa ng presyon ng dugo ang mabuting naidudulot ng DASH diet. Nakatutulong rin ito sa pagkontrol ng timbang, pagbawas ng panganib ng pagkakaroon ng diabetes, at sa pangkalahatang kalusugan.
Sa kabuuan, ang DASH diet ay isang mabisang paraan upang maiwasan ang altapresyon. Mahalagang sundin ito nang maayos at tuluy-tuloy para makamit ang pinakamagandang resulta. Tandaan na hindi sapat ang diyeta lamang, kailangan din itong samahan ng pag-eehersisyo at tamang pamamahala sa stress.
Huwag mag-atubiling kumonsulta sa inyong doktor bago magsimula ng bagong paraan ng pagkain o diet upang hindi makasama sa iyong kalusugan.