Ano ang hadhad?

Ang hadhad (Ingles: jock itch; medikal: tinea cruris) ay isang sakit sa balat sa singit na karaniwang nangyayari sa mga kabataang lalaki, dahil sa mga aktibidades na kanilang ginagawa gaya ng sports at mga iba pang larong pisikal.

Ano ang mga sanhi ng hadhad?

Ang sanhi ng hadhad ay iba’t ibang uri ng fungi na nagkakaroon ng pagkakataon na magdulot ng hadhad kung mabanas at basa ang singit. Dahil dito, ang mga taong madalas magkaroon ng hadhad ay ang mga kabataang madalas mag-sports (kaya nga “jock itch” ang tawag sa Ingles). Kung pawisan o mabasa ang shorts o brief at hindi kaagad mapaltan, maaaring magdulot ng hadhad ang mga fungus.

Ano ang mga sintomas ng hadhad o jock itch?

  • Pangangati sa singit
  • Mahapdi sa singit
  • Pamumula o pangingitim ng singit
  • Pagtuklap ng balat sa singit
  • Pantal-pantal o butlig-butlig

Kung mapabayaan, maaaring lumaki ang bahagi ng singit na apektado ng hadhad, at maaaring kulamat sa hita. Kapansin-pansin ang pagitan ng apektadong bahagi sa ‘di-apektadong bahagi, dahil sa pamumula o pangingitim ng apektadong bahagi.

Paano makakaiwas sa hadhad?

Image Source: www.freepik.com

Makakaiwas sa hadhad kung pananatilihing malinis ang katawan at malinis, tuyo, at maaliwalas ang kasuotan. Iwasan din ang paggamit ng tuwalya ng ibang tao. Huwag magsuot ng masyadong mahigpit na damit para makasingaw ang init sa katawan.

Gaanong katagal bago gumaling ang hadhad?

Sa wastong gamutan gamit ang antifungal cream, ilang araw lamang ay makakakita na ng pagbabago, at maguumpisa ng mawala ang hadhad. Maaaring abutin ng 1-2 linggo bago tuluyang mawala ang hadhad.

Kung ito’y hindi parin gumagaling sa kabila nang pag-gamit ng cream, magpakonsulta sa dermatologist o sinumang doktor
upang mabigyan ng karagdagang gamot o iba pang solusyon sa iyong karamdaman.